سویلین جوہری پروگرام پرکام کررہے ہیں اوریہ کوئی راز نہیں، سعودی عرب

ریاض: سعودی عرب نے کہا ہے کہ سول جوہری پروگرام پر کام کررہے ہیں اور یہ کوئی راز کی بات نہیں ہے۔

دارالحکومت ریاض میں سعودی وزیر خارجہ شہزادہ فیصل بن فرحان نے امریکی ہم منصب انٹونی بلنکن کے ساتھ مشترکہ پریس کانفرنس سے خطاب میں کہا کہ سعودی عرب اپنے سویلین جوہری پروگرام کو فروغ دے رہا ہے۔ دنیا کی بہترین ٹیکنالوجی کے ساتھ اپنا پروگرام تخلیق کرنا چاہتے ہیں اور اس کے لیے خاص معاہدے کی ضرورت ہوگی۔

سعودی وزیر خارجہ کا مزید کہنا تھا کہ کچھ ممالک جوہری پروگرام کے لیے بولی لگا رہے ہیں۔ ہم اس پروگرام کے لیے امریکا کو شامل کرنے کو ترجیح دیں گے۔ بعض امور پر امریکا سے اختلافات ہیں اس لیے ایسا طریقہ کار تلاش کررہے ہیں کہ سویلین ٹیکنالوجی پر امریکا کے ساتھ مل کر کام کرسکیں۔