چاکلیٹی ہیرو وحید مراد کی 31ویں برسی آج منائی جائیگی

آخری فلم ’’ہیرو ‘‘ تھی، وحید مراد کا ہیئر اسٹائل آج بھی نوجوانوں میں مقبول ہے۔ فوٹو: فائل

---

KARACHI: ستارہ امتیاز، پرائیڈ آف پرفارمنس، پاکستانی فلم انڈسٹری کے چاکلیٹی ہیرو وحید مراد کی 31ویں برسی آج منائی جائے گی۔

اس مناسبت سے وحید مراد لورز فیڈریشن، فلمی تنظیموں اور ان کے پرستاروں کی جانب سے مختلف شہروں میں خصوصی تعزیتی تقریبات کا انعقاد کیا جائے گا جن میں وحید مراد کی پاکستان کی فلم انڈسٹری کے لیے خدمات کو خراج عقیدت پیش کیا جائے گا۔ وحید مراد کی برسی کی مناسبت سے قرآن خوانی ، فاتحہ خوانی بھی کی جائے گی، وحید مراد 2 اکتوبر 1938ء کو کراچی میں معروف فلم ڈسٹری بیوٹر نثار مراد کے گھر پیدا ہوئے۔

فلم انڈسٹری کے رومانٹک اور اسٹائلش ہیرو کے طور پر پہچانے جانے والے اداکار وحید مراد نے ایس ایم یوسف کی فلم '' اولاد '' سے اپنے فنی سفر کا آغاز کیااور بہت جلد کروڑوں لوگوں کے دلوں پر حکمرانی کرنے لگے، ان کا ہیئر اسٹائل نوجوانوں میں بے پناہ مقبول ہوا وحید مراد نے ''اولاد ، انسان بدلتا ہے، جب سے تمہیں دیکھا ہے، بہارو پھول برساؤ، مستانہ ماہی،ناگ منی، ثریا بھوپالی، دیو ربھابھی، انجمن ، سالگرہ، ارمان، ہیرا اور پتھر، عندلیب، مستانہ ، ہیرو،دل میرا دھڑکن تیری'' سمیت 170 سے زائد فلموں میں اداکاری کے جوہر دکھائے۔ وحید مراد کی آخری فلم ''ہیرو'' تھی، وحید مراد 23 نومبر 1983ء کو 45 برس کی عمر میں اچانک دل کا دورہ پڑنے سے انتقال پاگئے۔