بی سی سی آئی کے سیکریٹری کا دوغلا پن سامنے آگیا

معاہدوں کا بھرم رکھنا مجبوری ہے،ایم او یو پردستخط گلے کی ہڈی بن گیا فوٹو:اےایف پی/فائل

---

بی سی سی آئی کے سیکریٹری انوراگ ٹھاکر کا دوغلا پن سامنے آگیا، ان کا کہنا ہے کہ سرحدوں پر لاشیں گررہی ہوں تو باہمی کرکٹ نہیں کھیلی جا سکتی۔

تفصیلات کے مطابق چند روز قبل پاک بھارت سیریز کی حمایت کرتے ہوئے اپنی حکومت پر اجازت کیلیے زور دینے والے بی سی سی آئی سیکریٹری انوراگ ٹھاکر ایک بار پھر ہرزہ سرائی پر اتر آئے۔ انھوں نے ایک انٹرویو میں کہا کہ ذاتی طور میرا خیال ہے کہ سرحدوں پر لاشیں گررہی ہوں تو باہمی کرکٹ نہیں کھیلی جا سکتی، البتہ بی سی سی آئی ایک تنظیم اورعالمی سطح پر معاہدوں کا بھرم رکھنا ہماری مجبوری ہے، سیاستدان ہونے کیساتھ میں بورڈ کا سیکریٹری بھی ہوں۔

دراصل حکومتی اجازت کے بغیر سابق ہم منصب سنجے پٹیل نے پی سی بی کیساتھ جس ایم او یو پر دستخط کیے وہ گلے کی ہڈی بن گیا، ہمیں پاکستان ہی نہیں آئی سی سی کے ہر فل ممبر کیساتھ طے پانے والے ایگریمنٹ کے مطابق چلنا ہوتا ہے، خواہ وہ کسی سال، ماہ، تاریخ، سیریز یا وینیو کے حوالے سے ہو، عوام سوشل میڈیا پر مجھ سے سیریز کے بارے میں بات کرتے ہیں لیکن میں بھارتیہ جنتا پارٹی یا اپنا ذاتی ایجنڈا بی سی سی آئی پر نہیں تھوپ سکتا، ایک تنظیم کے طور بھارتی بورڈ کوئی موقف اختیار کرے تو حکومت تک پہنچانا میرے فرائض میں شامل ہے۔