سندھ کابینہ نے کوآپریٹیو اور وکٹوریہ مارکیٹ کے متاثرین کو معاوضہ دینے کی منظوری دیدی

 کراچی: حکومت سندھ نے سانحہ بولٹن مارکیٹ کے طرز پر سانحہ کوآپریٹو و ویکٹوریہ مارکیٹ کے متاثرین کو معاوضہ ادا کرنے کا اعلان کیا ہے۔

سندھ کابینہ کے اجلاس کے بعد مشترکہ پریس کانفرنس کرتے ہوئے صوبائی وزرا سید ناصر حسین شاہ اور سعید غنی نے  کہا کہ سندھ کابینہ نے سانحہ کوآپریٹو مارکیٹ اور سانحہ وکٹوریہ مارکیٹ کے متاثرین کو معاوضہ دینے کی منظوری دے دی ہے اور انہیں بھی سانحہ بولٹن مارکیٹ کے طرز پر معاوضہ ادا کیا جائے گا۔

علاوہ ازیں انہوں نے کابینہ اجلاس میں ہونے والے فیصلوں سے متعلق بتایا کہ سندھ حکومت صوبے میں رواں برس گندم کی 14 لاکھ ٹن کی پروکیومنٹ یکم مارچ سے شروع کردے گی۔

انہوں نے کہا کہ سندھ لوکل گورنمنٹ ایکٹ میں ترمیم کی منظوری دی گئی ہے اور جب تک آئندہ بلدیاتی انتخات نہیں ہوجاتے ٹاونز پر عمل درآمد روک دیا گیا ہے۔

صوبائی وزرا نے کہا کہ نئے بلدیاتی الیکشن تک ڈسڑکٹ کونسل اور ڈی ایم سیز برقرار رہیں گی جبکہ سندھ کابینہ نے ان اطلاعات پر کہ اسٹیل ملزکی زمین سوئی سدرن گیس کو ان کے بقایاجات کی مد میں دے رہی ہے، شدید تحفظات کا اظہار کیا ہے۔

علاوہ ازیں انہوں نے کہا کہ پولیس کے لیے پستول کی خریداری کے لیے آئی جی کومزید تفصیلات فراہم کرنے اور مارکیٹ میں پرائس چیک کرنے کی ہدایات دی گئی ہیں۔