افتخار دھونی بننا چاہتے ہیں لیکن اننگز کا اختتام ان کی طرح نہیں کرتے اجمل

شان مسعود بھی 5 سے 7 ڈاٹ بالز کھیلتے ہیں جب شارٹس مارنے کا ٹائم آتا ہے تو وہ آؤٹ ہوجاتے ہیں، سابق اسپنر (فوٹو: ایکسپریس ویب)

---

سابق آف اسپنر سعید اجمل نے پاکستانی ٹیم کے مڈل آرڈر پر شدید تنقید کرتے ہوئے کہا کہ افتخار احمد اپنی اننگز دھونی کی طرح شروع کرتے ہیں لیکن اس کا اختتام انکے اسٹائل میں نہیں ہو پاتا۔

سعید اجمل نے یوٹیوب پر تبصرہ کرتے ہوئے کہا کہ افتخار احمد نے 27 گیندوں پر 27 رنز بنائے انہوں اپنے اسٹرائیک ریٹ کو بہتر کرنے کی کوشش نہیں کی، افتخار ایم ایس دھونی کی طرح کھیلتے ہیں، لیکن وہ ایم ایس کی طرح اننگز کو ختم کرنے میں ناکام رہے ہیں جبکہ اس کے برعکس دھونی آخری اوورز میں سنگلز اور چھکے چوکے لگا کر ٹیم کو اچھی پوزیشن میں لاکھڑا کرتے تھے۔

انہوں نے کہا کہ شان مسعود بھی اسی طرح ابتداء میں 5 سے 7 ڈاٹ بالز کھیلتے ہیں جب شارٹس مارنے کا ٹائم آتا ہے تو وہ آؤٹ ہوجاتے ہیں۔

مزید پڑھیں: بھارت کا ورلڈکپ اسکواڈ ''گیراج میں کھڑی بہترین کار جیسا ہے''، بریٹ لی

قبل ازیں ایشیاکپ اور انگلینڈ کے خلاف ہوم سیریز میں بھی مڈل آرڈر بری طرح ناکام ہوا تھا جس کے باعث پاکستان ایشاکپ کے فائنل اور ہوم سیریز میں 3-4 سے شکست ہوئی۔

دوسری جانب قومی ٹیم 23 اکتوبر کو ورلڈکپ میں اپنا افتتاحی میچ بھارت کے خلاف کھیلے گی تاہم تجریہ کاروں کو مڈل آرڈر پر اب بھی خدشات ہیں کیونکہ پاکستانی سائیڈ بابر اور رضوان پر انحصار کررہی ہے۔