عمران خان چند دنوں میں اسمبلیاں توڑ دیں گے، شاہ محمود

 لاہور: پاکستان تحریک انصاف کے وائس چیئرمین شاہ محمود قریشی نے کہا ہے کہ عمران خان چند دنوں میں اسمبلیاں توڑ دیں گے جو نئے انتخابات کے لیے ہمارا سنجیدہ اقدام ہوگا۔

ایکسپریس نیوز کے مطابق زمان پارک میں عمران خان کی زیر صدارت پی ٹی آئی رہنماؤں کا اجلاس ہوا، جس میں ملک کی موجودہ صورت حال اور اسمبلیاں تحلیل کرنے کے حوالے سے گفتگو کی گئی۔

اجلاس کے بعد پی ٹی آئی رہنماؤں کے ساتھ گفتگو کرتے ہوئے شاہ محمود قریشی نے کہا کہ تمام اراکین نے اسمبلی کی تحلیل کا مکمل اختیار عمران خان کو دے دیا ہے اور وہ اگلے چند روز میں پنجاب و خیبرپختونخوا کی اسمبلیاں تحلیل کرنے کا ارادہ رکھتے ہیں۔

انہوں نے کہا کہ قومی اسمبلی سے ہمارے ممبران پہلے ہی باہر آچکے ہیں جبکہ صوبائی اسمبلیاں بھی تحلیل ہونے کا معاملہ چل رہا ہے اس لیے اب ہم عملی طور پر پارلیمان کا حصہ نہیں ہیں۔

پی ٹی آئی وائس چیئرمین نے کہا کہ اجلاس میں سب کو اعتماد میں لیا گیا ہے اور اس بات پر اتفاق کیا گیا کہ ملک کے تمام سیاسی و معاشی مسائل کا حل نئے انتخابات ہیں۔

شاہ محمود نے کہا کہ ہماری خواہش ہے کہ پنجاب اور کے پی میں رمضان سے پہلے الیکشن کا عمل مکمل اور نئی حکومت آجائے، معیشت تیزی کے ساتھ تنزلی کی طرف جارہی ہے کیونکہ اب ملک میں سرمایہ کاری نہیں ہورہی۔

یہ بھی پڑھیں :پی ٹی آئی قیادت کا پنجاب کابینہ میں توسیع پر شدید تحفظات اور ناپسندیدگی کا اظہار

شاہ محمود قریشی نے کہا کہ ہم نے معاملات کے حل کے لیے صدر مملکت کے توسط سے بات چیت کرنے کی کوشش کی مگر حکومت کے ساتھ  فاصلوں میں کوئی پیشرفت نہیں ہوئی، ہم اداروں کے درمیان پیدا ہونے والی خلیج کو بھی دور کرنے کے لیے کردار ادا کررہے ہیں کیونکہ یہ ملکی مفاد میں ہے اور ہم کوئی نقصان دہ قدم اٹھانا نہیں چاہتے۔

انہوں نے واضح کیا کہ ملکی مسائل کا واحد حل شفاف انتخابات ہیں، ہماری خواہش ہے رمضان سے پہلے صوبوں میں نئی حکومتیں بن جائیں۔

یہ بھی پڑھیں :عمران خان پنجاب کابینہ میں توسیع سے لاعلم، خیال کاسترو وزیر بن گئے

عمران خان کو تکنیکی بنیاد پر سیاست سے آؤٹ نہیں کیا جاسکتا، فواد چوہدری

پی ٹی آئی رہنما فواد چوہدری نے کہا کہ عمران خان کو تکنیکی بنیاد پر سیاست سے آؤٹ نہیں کیا جاسکتا، وفاق کے رویے کے خلاف صوبائی حکومتوں نے اسلام آباد میں احتجاج کا فیصلہ کیا۔

’زرمبادلہ کے ذخائر میں خطرناک حد تک کمی ہوگئی‘

پی ٹی آئی کے جنرل سیکریٹری اور سابق وزیر خزانہ اسد عمر نے کہا کہ ملک کی معاشی حالات بہت خراب ہے، زرمبادلہ کے ذخائر میں خطرناک حد تک کمی ہوگئی ہے، پاکستان کو انتشار اور معاشی مشکلات سے نکالنے کا واحد حل شفاف انتخابات ہیں۔