پرویز مشرف کو بیرون ملک جانے کی اجازت نہ دی جائے وزیراعظم کو لیگی رہنماؤں کی تجویز

مشاورتی اجلاس میں پرویز مشرف کو بیرون ملک جانے کی اجازت سے متعلق درخواست پر غور کیا گیا۔ فوٹو: فائل

---

وزیراعظم نواز شریف کو مسلم لیگ (ن) کے رہنماؤں نے سابق صدر پرویز مشرف کو بیرون ملک نہ جانے دینے کی تجویز دے دی۔

وزیراعظم نواز شریف کی زیر صدارت غیر رسمی مشاورتی اجلاس میں وزیر داخلہ چوہدری نثار، وزیر اطلاعات پرویز رشید،وزیر دفاع خواجہ آصف، ڈاکٹر قادر بلوچ اور وزیر اعظم کے معاون خصوصی عرفان صدیقی نے شرکت کی۔ اجلاس میں طالبان کےساتھ مذاکراتی عمل میں اب تک ہونے والی پیش رفت اور آئندہ کے لائحہ عمل پر تبادلہ خیال کیا گیا۔ اس کے علاوہ اجلاس میں پرویز مشرف کا نام ای سی ایل سے خارج کئے جانے سے متعلق بھی مشاورت ہوئی جس میں پاکستان مسلم لیگ (ن) کے رہنماؤں نے تجویز دی کہ پرویز مشرف کو بیرون ملک جانے کی اجازت نہ دی جائے۔

مشاورت اجلاس کے پہلے سیشن کے بعد وزیر اعظم کی سربراہی میں اعلیٰ سیاسی اور عسکری قیادت کا اجلاس بھی ہوا، جس میں وفاقی وزیر داخلہ چوہدری نثار علی خان، وزیر اطلاعات پرویز رشید، وزیر دفاع خواجہ آصف اور وزیر خزانہ اسحاق ڈار کے علاوہ آرمی چیف جنرل راحیل شریف اور ڈی جی آئی ایس آئی لیفٹیننٹ جنرل ظہیر الاسلام نے شرکت کی۔ اجلاس میں قومی سلامتی کے امور طالبان سے مذاکرات میں اب تک ہونے والی پیش رفت اور دیگر امور پر بھی تفصیلی تبادلہ خیال کیا گیا۔