لاہور میں جنسی درندگی کے واقعات میں اضافہ، مزید 4 خواتین نشانہ بن گئیں

ویب ڈیسک  ہفتہ 3 جون 2023
—فائل فوٹو

—فائل فوٹو

 لاہور: شہر میں جنسی درندگی کے واقعات میں مسلسل اضافہ ہونے لگا، سفاک ملزمان نے مزید چار خواتین کو زیادتی کا نشانہ بنا ڈالا۔

پولیس کے مطابق کوٹ لکھپت کے علاقے میں پٹواری اور اس کے ساتھی نے خاتون کو فرد دینے کے بہانے مبینہ طور پر جنسی درندگی کا نشانہ بنا کر فحش ویڈیو بنا کر 16 لاکھ روپے ہتھیا لیے۔

پولیس کا کہنا ہے کہ اٹاری سروبہ کی رہائشی (ش) نامی خاتون پٹوار خانے فرد بنوانے گئی تھی جہاں پٹواری عارف اور منشی نذیر نے فرد بنانے کے بہانے اُسے اپنے گھر بلوایا۔

پولیس کے مطابق پٹواری عارف نے (ش) کو گھر میں جنسی درندگی کا نشانہ بنایا جبکہ اس کے ساتھی منشی نذیر نے فحش ویڈیو بنائی، ملزمان نے خاتون کو بلیک میل کرکے 16 لاکھ روپے بھی ہتھیا لیے۔

دوسری جانب قائد اعظم انڈسٹریل اسٹیٹ کے علاقے میں سفاک ملزم نے جواں سالہ لڑکی کو نوکری کا جھانسہ دے کر جنسی درندگی کا نشانہ بنا ڈالا۔

پولیس کا کہنا ہے کہ (م) نامی لڑکی اسٹاپ پر کھڑی تھی کہ ملزم ندیم لڑکی کے قریب آیا رومال سونگھایا جس سے لڑکی بے ہوش ہوگئی، ملزم نے ایک مکان میں لے جا کر لڑکی کو جنسی درندگی کا نشانہ بنا ڈالا۔

زیادتی کا تیسرا واقعہ شادباغ کے علاقے میں پیش آیا جہاں نوید اپنی بیوی (ا) کے ہمراہ گھر پر سویا ہوا تھا کہ اس دوران نامعلوم ملزم دیوار پھلانگ کر گھر میں گھس گیا۔

نامعلوم ملزم نے نوید کو سر پر ڈنڈے مار کر زخمی کردیا اور اسکے ہاتھ پاﺅں باندھ دیے، ملزم نے خاتون کو اس کے شوہر کے سامنے جنسی درندگی کا نشانہ بنایا اور جاتے ہوئے دونوں میاں بیوی کے ہاتھ پاﺅں باندھ کر فرار ہوگیا۔

چوتھے واقعے میں نواب ٹاﺅن کے علاقے میں تین سفاک ملزمان نے جواں سالہ لڑکی کو اجتماعی زیادتی کا نشانہ بنا ڈالا اور فرار ہوگئے، پولیس کا کہنا ہے کہ ملزمان تصور، سعود ، کاشی نے منچلے خاں کی بیٹی (ف) کو اغواء کرکے اجتماعی زیادتی کا نشانہ بنایا۔

پولیس نے تمام واقعات کے علیحدہ علیحدہ مقدمات درج کرلیے ہیں مگر جینڈرکرائم سیل کسی بھی ملزم کو گرفتار نہیں کر سکا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔