خیبر پختوخوا 19 سرکاری افسروں سمیت 31 ملزمان پر 110 کروڑ کی کرپشن کا ریفرنس دائر
ضم شدہ اضلاع خیبر، باجوڑ اور مہمند میں ایس ڈی جیز کے منصوبوں میں ملزمان نے مل بھگت سے 47 ٹھیکے دیے، نیب
نیب خیبر پختونخوا نے ضم شدہ اضلاع میں کرپشن کے الزام میں پاک پی ڈبلیو ڈی کے 19 افسروں سمیت 31 ملزمان کے خلاف ایک ارب 9 کروڑ 80 لاکھ روپے کا ریفرنس دائر کردیا۔
ایکسپریس نیوز کے مطابق ضم شدہ اضلاع خیبر، باجوڑ اور مہمند میں ایس ڈی جیز کے منصوبوں میں بڑے پیمانے پر غبن کا انکشاف ہوا ہے، غیر قانونی ٹھیکوں اور کرپشن کے الزام میں نیب نے تحقیقات مکمل کرکے پاک پی ڈبلیو ڈی کے 19 افسران سمیت 31 ملزمان کے خلاف احتساب عدالت میں 1098 ملین روپے کا ریفرنس دائر کردیا۔
ریفرنس میں بتایا گیا ہے کہ حکومت نے ایس ڈی جیز پروگرام کے تحت تینوں اضلاع میں ترقیاتی اسکیموں کے لیے لگ بھگ 1800 ملین روپے فنڈ مختص کیا تھا، مذکورہ فنڈ تینوں اضلاع میں 52 ترقیاتی اسکیموں کے لیے تھا، فنڈ 2021۔ 22 میں مختص کیا گیا تھا جس میں ملزمان نے ملی بھگت کے ذریعے غیر قانونی طور پر 47 ٹھیکے دیے۔
ریفرنس میں بتایا گیا ہے کہ ملزمان نے جعلی پیمائشی کتب پر پیمنٹ بھی کی، ملزمان نے ملی بھگت، غیر قانونی ٹھیکوں اور جعلی پیمائشی بکس سے قومی خزانے کو 1098 ملین روپے کا نقصان پہنچایا ہے۔