قوم اور مسلح افواج چیلنجز سے نمٹنے کے لئے متحد ہیں صدرممنون حسین

ترقی کی راہ میں رکاوٹیں ڈالنے کی کوشش نہیں کرنی چاہئے، صدر مملکت فوٹو: فائل

---

صدر مملکت ممنون حسین نے کہا ہے کہ پاکستان مشکل دورسے گزررہاہے، ملک کو درپیش چیلنجز سے نمٹنے کے لئے قوم اور مسلح افواج اکٹھی ہیں۔

اسلام آباد میں نیشنل ڈیفنس یونی ورسٹی میں تقریب سے خطاب کے دوران صدر مملکت ممنون حسین کا کہنا تھا کہ ملک مشکل دور سے گزررہا ہے، پاکستانی افواج دہشت گردوں کے خلاف نبردآزما ہیں، دہشتگردی کے خاتمے تک جنگ جاری رہے گی۔ حکومت اور افواج پاکستان مل کر دہشت گردی کا مقابلہ کرنے کےلئے تیار ہیں ۔ دہشت گردوں کے مکمل خاتمے تک یہ تعاون جاری رہے گا۔ انہوں نے کہا کہ پاکستانی قوم باہمت اور حوصلہ مند ہے ۔قوم متحد ہوکر دہشت گردوں کو احساس دلائے کہ اس کا مقابلہ صرف فوج سے نہیں بلکہ پوری قوم سے ہے۔

صدر مملکت کا کہنا تھا کہ ملک میں ترقیاتی منصوبوں پر کام ہورہا ہے۔ چین کی مدد سے ملک میں اکنامک کوریڈوربنانا چاہتے ہیں، یہ کوریڈور کاشغر سے گوادر تک بنے گا، اکنامک کوریڈور کی تکمیل سے پاکستان خطے کااہم ملک بن جائے گا۔ حکومت کے شروع کئے گئے منصوبے مکمل ہونے پر ملکی مشکلات دور ہوجائیں گی۔ ترقی کی راہ میں رکاوٹیں ڈالنے کی کوشش نہیں کرنی چاہئے۔