وزیراعلیٰ مریم نواز شریف نے سوسال سے کام کرنے والی بین الاقوامی جاپانی کمپنی کو پنجاب میں ڈیری کے شعبے میں سرمایہ کاری کی دعوت دے دی۔
موریناگا انٹرنیشنل کو نوزائیدہ بچوں کی خوراک سمیت دیگر بیکری مصنوعات اور برآمدی معیار کے گوشت کی مقامی پیداوار میں منصوبوں کی پیشکش کی گئی۔
حیوانات کے شعبے میں جدید جاپانی مشینری اور طریقوں کے استعمال، معیاری گوشت کے حصول کے لئے صحت مند جانوروں کی افزائش نسل کے لئے پنجاب حکومت سے تعاون پر اتفاق کیا گیا۔
وزیراعلیٰ مریم نواز شریف نے ڈیری مصنوعات میں عالمی شہرت یافتہ جاپانی کمپنی موریناگا ہیڈکوارٹر اور پلانٹ کا دورہ کیا اور مِلک انڈسٹری کمپنی کے مختلف شعبے دیکھے۔
وزیراعلیٰ مریم نوازشریف نے موریناگا کے تحقیق اور ترقی کے شعبوں کا بھی دورہ کیا، اس موقع پر انہیں کمپنی کی جانب سے تفصیلی بریفنگ دی گئی۔
وزیراعلی مریم نواز شریف نے گفتگو کرتے ہوئے کہا کہ موریناگا کے ڈیری میں تجربات کو پنجاب میں ڈیری کے شعبے کی ترقی کے لئے ماڈل بنانا چاہتے ہیں، موریناگا کمپنی کو ڈیری مصنوعات کے حوالے پنجاب حکومت تمام سہولیات مہیا کرے گی، پنجاب میں ڈیری ڈویلپمنٹ اورایڈوانس پروٹین نیٹ ورک قائم کرنے کے لئے جاپانی کمپنیوں کا خیر مقدم کریں گے۔
انہوں نے کہا کہ فارمولامِلک نوازائیدہ بچوں کی جسمانی وذہنی نشوونما کے لئے ضروری ہے، ماں کی حیثیت سے بچوں کی نگہداشت میرے لئے اہم ہے، 2017 میں وزیراعظم محمدنواز شریف وزیراعلی محمد شہباز شریف کے دور میں موریناگا نے پنجاب میں سرمایہ کاری کی۔
ان کا کہنا تھا کہ دودھ کی پیداوار کی لحاظ سے چوتھے بڑے ملک پاکستان میں، پنجاب کا شیئر 60 فیصد ہے، شیخوپورہ میں موریناگا کی سرمایہ کاری پنجاب اور جاپان کے فلیگ شپ شراکت داری کی واضح مثال ہے، پنجاب کے ڈیری سیکٹر میں 80 فیصد قدیم طریقوں سے پیداوار اورمعیار دونوں مسائل کا سامنا ہے۔
مریم نواز نے کہا کہ موریناگا کی شراکت داری سے زراعت اور لائیو سٹاک سے وابستہ پنجاب کی 63 فیصدآبادی کو فائدہ ہو گا، وزیراعلیٰ مریم نواز شریف نے موریناگا مِلک انڈسٹری کے پنجاب میں بزنس ٹرینڈ کو قابل تحسین قرار دیا۔
بعد ازاں پہلی خاتون وزیراعلیٰ پنجاب مریم نواز شریف نے ٹوکیو کی پہلی خاتون نائب گورنر ماتسوموتو آکیکو سے ملاقات کی۔
دونوں رہنماؤں نے خواتین کی قیادت، بااختیار بنانے، اور پاک جاپان تعلقات کو نئی جہت دینے پر گفتگو کی۔
اس دوران انفراسٹرکچر، شہری ترقی، قابلِ تجدید انرجی اور صاف پانی جیسے شعبوں میں تعاون پر اتفاق کیا گیا۔
وزیراعلی مریم نواز شریف نے کہا کہ خواتین کو بااختیار بنانے کے لئے انقلابی منصوبے شروع کئے ہیں، جاپان ترقی اور اقدار کا شاندار امتزاج اور قابل رشک مثال ہے۔
