مظفرآباد:
پاکستان مسلم لیگ (ن) کے رکن قومی اسمبلی میں آزاد کشمیر میں احتجاج کرنے والی عوامی ایکشن کمیٹی سے مذاکراتی ٹیم کے رکن ڈاکٹر طارق فضل چوہدری نے کہا ہے کہ عوامی ایکشن کمیٹی سے معاملات طے پاگئے ہیں اور حتمی معاہدے پر دستخط جلد متوقع ہیں۔
ڈاکٹر طارق فضل چوہدری نے کہا کہ اب تک مذاکرات میں مثبت پیش رفت سامنے آئی ہے اور مذاکرات کا حتمی دور جاری ہے۔
انہوں نے کہا کہ ایکشن کمیٹی آزاد جموں و کشمیر سے معاملات طے پا گئے ہیں اور جلد حتمی معاہدے پر دستخط متوقع ہیں، عوامی مفادات اور امن ہماری ترجیح ہیں۔
قبل ازیں انہوں نے سماجی رابطے کی ویب سائٹ پر پیغام میں کہا تھا کہ آزاد کشمیر کے دارالحکومت مظفر آباد میں حکومت اور جوائنٹ ایکشن کمیٹی کے درمیان مذاکرات کا دوسرا دور جاری ہے۔
پاکستان مسلم لیگ (ن) کے رکن قومی اسمبلی طارق فضل چوہدری نے ایکس پر جاری بیان میں کہا کہ مظفرآباد میں وزیراعظم پاکستان شہباز شریف کی ہدایت پر بھیجی گئی ہماری مذاکراتی ٹیم اور جوائنٹ ایکشن کمیٹی آزاد جموں و کشمیر کے نمائندگان کے درمیان مذاکرات کا دوسرا دور جاری ہے۔
انہوں نے کہا کہ ہم کشمیری عوام کے حقوق کے مکمل حامی ہیں، ان کے زیادہ تر مطالبات جو عوامی مفاد میں ہیں، پہلے ہی منظور کیے جا چکے ہیں اور باقی چند مطالبات جن کے لیے آئینی ترامیم درکار ہیں ان پر بات چیت جاری ہے۔
ڈاکٹر طارق فضل چوہدری نے کہا کہ ہم سمجھتے ہیں کہ تشدد کسی مسئلے کا حل نہیں ہے، ہماری امید ہے کہ ایکشن کمیٹی تمام مسائل کو پرامن مکالمے کے ذریعے حل کرے گی۔
عوامی ایکشن کمیٹی کے ساتھ مذاکرات کے لیے حکومتی ٹیم میں وفاقی وزرا رانا ثنااللہ، احسن اقبال، سردار یوسف اور امیر مقام، ڈاکٹر طارق فضل چوہدری، پاکستان پیپلزپارٹی (پی پی پی) کے رہنما قمر زمان کائرہ اور سابق وزیراعظم راجا پرویز اشرف اور سابق صدر آزاد کشمیر سردار مسعود خان شامل ہیں۔
آزاد کشمیر کی حکومتی مذاکراتی کمیٹی بھی اجلاس میں شریک ہے تاہم عوامی ایکشن کمیٹی کی جانب سے شوکت نواز میر، راجا امجد ایڈووکیٹ اور انجم زمان شریک ہیں۔
