شہر قائد میں ڈکیتوں نے ایک اور نوجوان کو مزاحمت پر قتل کر کے خاندان اجاڑ دیا، رواں برس جاں بحق افراد کی تعداد 86 ہوگئی۔
ایکسپریس نیوز کے مطابق اورنگی ٹاؤن فقیر کالونی پریشان چوک کے قریب فائرنگ سے نوجوان جاں بحق ہوگیا۔ مقتول کی لاش کو ایدھی ایمبولینس کے زریعے سول اسپتال منتقل کیا گیا جہاں مقتول کی شناخت 18 سالہ نصیر احمد ولد پیر خان کے نام سے ہوئی۔
ایس ایچ او مومن آباد معراج انور نے بتایا کہ واقعہ ڈکیتی مزاحمت کے دوران پیش آیا۔ ابتدائی تفتیش کے مطابق موٹر سائیکل سوار ملزمان نے اتحاد ٹاؤن تھانے کی حدود عابد آباد چنگچی اسٹاپ کے قریب کسی شہری سے لوٹ مار کے بعد ملزمان فرار ہورہے تھے۔
اطلاع کے مطابق جس سے واردات ہوئی تھی وہ شہری ملزمان کا تعاقب کرتے ہوئے پریشان چوک کے قریب پہنچ گیا ۔ شہری نے شور مچایا تو نصیر نے بھی چور چور کی آوازیں لگانا شروع کردیں جس پر ملزمان نے پکڑے جانے کے خوف سے فائرنگ شروع کردی ۔
ملزمان نے 3 گولیاں چلائیں جس میں سے ایک گولی نصیر کو سینے پر لگی جو جان لیواثابت ہوئی، مقتول نصیر راہ کابلی چوک عابد آباد پولیس چوکی کے قریب کا رہائشی تھا۔ ملزمان فائرنگ کرنے کےبعد موقع سے فرار ہوگئے۔
ایس ایچ او مومن آباد معراج انور کا مزید کہنا تھا کہ مذکورہ مقام تھانہ اتحاد ٹاؤن ڈسٹرکٹ کیماڑی کی حدود میں آتا ہے جبکہ ایس ایچ او اتحاد ٹاؤن اسد الٰہی نے بتایا کہ عابد آباد میں ڈاکوؤں کی جانب سے کسی شہری کو لوٹنے کا واقعہ سامنے نہیں آیا۔
جائے وقوعہ پر سوپ لگانے والے ایک شہری نے پولیس کو بتایا کہ موٹر سائیکل سوار 2 ملزمان نے شہری سے لوٹ مار کی کوشش کی جس پر شہری نے مزاحمت کی تو ملزمان نے فائرنگ کی اور فرار ہوگئے۔
سول اسپتال کے باہر مقتول نصیر کے لواحقین نے میڈیا سے بات چیت کرتے ہوئے بتایا کہ مقتول نوجوان واقعےکےوقت دوست کےہمراہ موٹرسائیکل پرچائےپینےجارہاتھا، ڈاکوموبائل فون چھین کر فرار ہوئے تو نصیر نے دوست کے ہمراہ ڈاکووں کاتعاقب کیا۔
اہل خانہ اس ہی دوران نصیرنے ڈاکووں کے پیچھے شورمچایا تو ملزموں نےفائرنگ کردی۔ انہوں نے مزید بتایا کہ مقتول نصیرچار بھائیوں میں تیسرے نمبر پر تھا اور شیرشاہ میں اسکریپ کےگودام میں کام کرتاتھا۔ تاہم رات گئے آخری اطلاعات تک ڈسٹرکٹ کیماڑی اور ڈسٹرکٹ ویسٹ پولیس حدود کے تنازع پر الجھی رہی۔
واضح رہے کہ رواں سال ڈاکوؤں کی فائرنگ سے جاں بحق ہونے والے شہریوں کی تعداد 86 ہوگئی۔
