پیپلز پارٹی کا ایک بار پھر سردار ایاز صادق کی بطور اسپیکر حمایت کا اعلان

تحریک انصاف نے اسپیکر قومی اسمبلی کے لئے شفقت محمود جب کہ فاٹا اراکین نے جی جی جمالی کو نامزد کیا ہے۔ فوٹو: فائل

---

THE HAGUE: پیپلز پارٹی کی پارلیمانی کمیٹی نے ایک بار پھر سردار ایاز صادق کی بطور اسپیکر قومی اسمبلی حمایت کا فیصلہ کیا ہے۔

ایکسپریس نیوز کے مطابق قومی اسمبلی کے اجلاس سے قبل پیپلز پارٹی کی پارلیمانی کمیٹی کا اجلاس قائد حزب اختلاف خورشید شاہ کی زیر صدارت ہوا جس میں اسپیکر قومی اسمبلی کی حمایت سمیت مختلف امور پر تبادلہ خیال کیا گیا۔

اجلاس میں فیصلہ کیا گیا کہ سردار ایاز صادق نے پچھلی مرتبہ بہت اچھے انداز سے ایوان کو چلایا لہذا اگر مسلم لیگ (ن) نے سردار ایاز صادق کو ہی دوبارہ اسپیکر لے لئے نامزد کیا تو ان کی حمایت کی جائے گی۔ دوسری جانب پاکستان تحریک انصاف نے اسپیکر قومی اسمبلی کے لئے شفقت محمود جب کہ فاٹا اراکین نے جی جی جمالی کو نامزد کیا ہے۔

واضح رہے کہ پاکستان تحریک انصاف کی جانب سے 2013 کے عام انتخابات میں این اے 122 میں دھاندلی کا الزام عائد کیا تھا جس پر الیکشن ٹریبونل نے حلقے میں دوبارہ انتخاب کرانے کا حکم دیا تھا، گزشتہ ماہ ہونے والے ضمنی انتخاب میں ایک بار پھر سردار ایاز صادق کامیاب قرار پائے تھے اور پھر مسلم لیگ (ن) نے انھیں ایک بار پھر اسپیکر قومی اسمبلی بنانے کا فیصلہ کیا۔ سردار ایاز صادق 2013 کے عام انتخابات کے بعد 218 ووٹ لے کر اسپیکر قومی اسمبلی منتخب ہوئے تھے۔