برطانیہ میں پیرس طرز کے حملوں کا خطرہ ہائی الرٹ جاری

القاعدہ کے حامی شمالی افریقا سے برطانیہ میں دہشت گردی کرسکتے ہیں، برطانوی وزارت داخلہ ، فوٹو: فائل

---

پیرس حملوں کے بعد برطانیہ میں بھی خوف کے سائے لہرانے لگے ہیں جہاں اسی طرز کے حملوں کے خدشہ کے پیش نظر سیکیورٹی سخت کرتے ہوئے ہائی الرٹ جاری کردیا گیا ہے جب کہ وزیر اعطم ڈیوڈ کیمرون نے دفاعی بجٹ میں 12 ارب پاؤنڈ کا اضافہ اور 10 ہزار فوجیوں کو کسی بھی حملے سے نمٹنے کے لیے تیار رہنے کے احکامات جاری کردیئے ہیں۔

برطانوی وزارت داخلہ کی جانب سے جاری بیان میں کہا گیا ہے کہ انٹیلی جنس معلومات کے بعد پیرس طرز کے حملوں کے خدشے کے پیش نظر سیکیورٹی سروسز کو انتہائی الرٹ رہنے کا حکم دے دیا گیا۔ وزارت داخلہ کے مطابق القاعدہ کے حامی شمالی افریقا سے برطانیہ میں دہشت گردی کرسکتے ہیں اس لیے آرمی، ایم 15 اور دیگر سیکورٹی اداروں کو الرٹ کردیا گیا ہے۔

دوسری جانب برطانوی وزیر اعظم ڈیود کیمرون نے 10 ہزار فوجیوں کو الرٹ رہنے کا حکم دے دیا ہے جو کسی بھی دہشت گردی کے دوران برطانوی شہروں کی سڑکوں پر تعینات کیے جا سکیں گے۔ ان کا کہنا تھا کہ یہ منصوبہ نئے سیکیورٹی منصوبے کا حصہ ہیں جو دہشت گردی کے حملوں کے خدشے کے باعث بنایا گیا ہے جب کہ دفاعی بجٹ میں بھی 12 ارب پاونڈز کا اضافہ کیا جا رہا ہے۔