پاکستان میں آلودہ پانی لاکھوں انسانوں کی موت کی وجہ بن گیا

آبادی کے پھیلاؤ اور بنیادی سہو لتوں کے فقدان نے پاکستان میں انسانی صحت پر سوالیہ نشان لگادیا ہے.فوٹو:فائل

---

آج پاکستان سمیت دنیا بھر میں عالمی یوم صحت منایا جارہا ہے لیکن صورت حال یہ ہے کہ وطن عزیز میں ہر سال لاکھوں افراد صرف آلودہ پانی پینے کی وجہ سے اپنی جان سے ہاتھ دھو بیٹھتے ہیں۔

ہر سال 7 اپریل کو دنیا بھر میں صحت کا دن منایا جارہا ہے جس کا مقصد لوگوں کو ایسے آسان طریقوں سے آگاہ کرنا ہے جس پر عمل کرتے ہوئے صحت مند غذا تک رسائی ممکن ہوسکے۔ آبادی کے پھیلاؤ اور بنیادی سہولیات کے فقدان نے پاکستان میں انسانی صحت پر سوالیہ نشان لگادیا ہے۔ آلودہ پانی کا استعمال اور غیر معیاری خوراک پاکستان میں صحت کے مسائل کو جنم دینے کا ایک بنیادی سبب ہے۔

پاکستان میڈیکل ایسوسی ایشن کے سابق سیکرٹری جنرل ڈاکٹر قیصر سجاد کے مطابق پاکستان میں مضر صحت کھانے اور پانی کے باعث معدے اور چھوٹی آنت کی سوزش کی بیماری سب سے زیادہ پائی جاتی ہے، اس کے علاوہ ڈائریا، ہیپاٹائٹس اے اور ٹائیفائڈ جیسی بیماریوں میں بھی دن بدن اضافہ ہورہا ہے۔ ملک میں محض آلودہ پانی کی وجہ سے ہر سال 30 لاکھ افراد مختلف بیماریوں میں مبتلا ہوتے ہیں جن میں لاکھوں بروقت علاج نہ ہونے پر موت کے منہ میں چلے جاتے ہیں۔ ضرورت اس بات کی ہے کہ ارباب اختیار اس بات کو یقینی بنائیں کہ وہ عوام تک مضر اثرات سے پاک غذا کی پہنچ کو یقینی بنائے۔