سرحد پار سے پاک فوج پر حملوں میں 5 جوان زخمی 6 دہشت گرد ہلاک

دہشت گرد افغانستان میں حکومتی عملداری نہ ہونے کا فائدہ اٹھا کر حملے کر رہے ہیں، آئی ایس پی آر فوٹو:فائل

---

RAWALPINDI: افغانستان میں موجود دہشت گردوں نے باجوڑ اور بلوچستان کے علاقے قمر دین کاریز میں پاک فوج کے جوانوں پر حملے کیے جس کے نتیجے میں 5 اہلکار زخمی ہوگئے جب کہ جوابی کارروائی میں 6 دہشت گرد ہلاک ہوگئے۔

پاک فوج کے شعبہ تعلقات عامہ (آئی ایس پی آر) کے مطابق افغان سرحد سے دہشت گردوں نے خیبرپختون خوا کے علاقے باجوڑ اور بلوچستان میں قمر دین کاریز میں سرحدی چوکیوں اور باڑ لگانے والے فوجی جوانوں پر فائرنگ کی جس کے نتیجے میں ایف سی کے 4 اور پاک فضائیہ کا ایک جوان زخمی ہوگیا۔

سرحد پار سے باجوڑ میں 24 گھنٹوں کے دوران 7 حملے کیے گئے، آئی ایس پی آر

آئی ایس پی آر کے مطابق سرحد پار سے باجوڑ میں 24 گھنٹوں کے دوران 7 حملے کئے گئے، سیکیورٹی فورسز نے باڑ کی تنصیب اور سرحدی چوکیوں کے قیام سے روکنے کی دہشت گردوں کی کوششوں کو ناکام بنا دیا۔ جوابی فائرنگ کے نتیجے میں 6 دہشت گرد ہلاک اور متعدد زخمی ہوگئے۔

دہشت گرد افغانستان میں حکومتی عمل داری نہ ہونے کا فائدہ اٹھا رہے ہیں، آئی ایس پی آر

ترجمان کا کہنا ہے کہ دہشت گرد افغانستان میں حکومتی عمل داری نہ ہونے کا فائدہ اٹھا کر پاکستان پر حملے کر رہے ہیں لیکن پاکستان تمام چیلنجز کے باوجود سرحدوں کو محفوظ بنانے کے لیے باڑ کی تنصیب اور سرحدی چوکیوں کے قیام کا کام جاری رکھے گا۔