مریم نواز کا نام ای سی ایل سے نکالنے سے متعلق تجاویز مرتب

ای سی ایل میں نام شامل کرنے کا میمورنڈم بنیادی حقوق کی خلاف ورزی ہے، درخواست گزار (فوٹو: فائل)

---

وزارت قانون نے مسلم لیگ (ن) کی نائب صدر مریم نواز کا نام ای سی ایل سے نکالنے یا نہ نکالنے سے متعلق تجاویز مرتب کرلیں۔

وزارت قانون کے ترجمان کے مطابق مریم نواز کا نام ای سی ایل سے ہٹانے یا نہ ہٹانے سے متعلق تجاویز مرتب کرلی گئیں، اس حوالے سے منگل 24 دسمبر کو کابینہ کے اجلاس میں تجاویز پیش کی جائیں گی۔ کابینہ اجلاس میں حتمی فیصلے کے بعد حکومت اپنے فیصلے سے لاہور ہائی کورٹ کو آگاہ کرے گی۔

دوسری جانب مریم نواز نے لاہور ہائی کورٹ میں اپنا نام ای سی ایل سے نکالنے کے لیے ایک اور درخواست دائر کردی۔ درخواست میں وزارت داخلہ، ڈی جی ایف آئی اے اور چیئرمین نیب سمیت دیگر کو فریق بنایا گیا ہے۔ درخواست میں موقف اختیار کیا گیا ہے کہ ان کا نام بغیر نوٹس دئیے ای سی ایل میں شامل کیا گیا، ای سی ایل میں نام شامل کرنے کا میمورنڈم بنیادی حقوق کی خلاف ورزی ہے۔

درخواست گزار نے عدالت سے استدعا کرتے ہوئے کہا ہے کہ حکومت کو نام ای سی ایل سے نکالنے کا حکم دیا جائے اور نام ای سی ایل میں شامل کرنے کا میمورنڈم غیر آئینی اور غیر قانونی قرار دے کر کالعدم کیا جائے۔ علاوہ ازیں درخواست کے حتمی فیصلے تک ایک بار 6 ہفتوں کے لیے مریم نواز کو بیرون ملک جانے کی اجازت دی جائے۔