سندھ کی خواتین میں کورونا کی شرح بڑھ رہی ہے مرتضیٰ وہاب

26 فیصد خواتین مریض بن چکیں، 10 سال سے کم عمر کے 253 بچے شکار ہوچکے ہیں، ترجمان سندھ حکومت

---

ترجمان سندھ حکومت بیرسٹر مرتضی وہاب نے کہا ہے کہ سندھ میں خواتین میں کورونا کیسز کی تعداد بڑھنے لگی ہے حالیہ دنوں میں خواتین میں کورونا کیسز کی شرح میں اضافہ ہوا ہے۔

اپنے بیان میں انہوں نے کہا کہ کورونا کے مجموعی کیسز کا 26 فیصد خواتین مریض ہیں اور اب معصوم بچے بھی کورونا وائرس کا شکار ہورہے ہیں، 10 سال سے کم عمر کے 253 بچے شکار ہوچکے ہیں۔

انہوں نے کہا کہ یہ اعداد و شمار بتانے کا مقصد ہے کہ کورونا اب ہمارے گھروں تک میں گھس چکا ہے کیونکہ ہم احتیاط برتنے میں غفلت برت رہے ہیں، سماجی دوری اور احتیاطی تدابیر پر عمل نہیں کررہے جس کی وجہ سے ہماری گھر کی خواتین اور بچے بھی متاثر ہونا شروع ہوگئے ہیں ہمارے احتیاط نہ کرنے کی وجہ سے ہمارے اہل خانہ متاثر ہورہے ہیں۔

بیرسٹر مرتضی وہاب نے کہا کہ پچھلے دو ماہ میں سندھ کے عوام نے حکومت کا بہت ساتھ دیا جس کی وجہ سے کورونا کے کیسز میں اتنی زیادہ تیزی نہیں تھی جتنی اب دیکھنے میں آرہی ہے، حکومت کو عوام کی پریشانیوں کا ادراک ہے لیکن یہ پریشانیاں اور مشکلات کسی کی جان سے زیادہ نہیں ہیں۔

بیرسٹر مرتضی وہاب نے کہا کہ انشاء اللہ بہت جلد معاشی مشکلات دور ہوں گی لیکن اس کے لیے ہمیں کورونا کے خلاف جنگ جیتنا ہوگی آئیے ہم خود بھی اور ایک دوسرے کو گھروں پر رہنے کی تلقین کریں۔