بہادر کشمیری رہنما اشفاق مجید وانی کی شہادت کو 33سال مکمل

ویب ڈیسک  جمعرات 30 مارچ 2023
فوٹو فائل

فوٹو فائل

اشفاق مجید وانی سے لے کر برہان وانی تک تحریکِ آزادی کی تاریخ خون سے لکھی جا رہی ہے، بہادر کشمیری رہنما اشفاق مجید وانی کی شہادت کو 33سال مکمل ہوگئے۔

اشفاق مجید وانی 5 ستمبر 1966 کو سرائے بالا سرینگر میں پیدا ہوئے جو فٹبال، ٹیبل ٹینس اور میراتھون کے بہترین کھلاڑی تھے۔ 1985 میں بین الریاستی میراتھون ٹورنامنٹ میں پہلی پوزیشن حاصل کی۔

سال 1984 میں معروف کشمیری رہنما مقبول بٹ کی شہادت سے بے حد متاثر ہوئے۔ 23 مارچ 1987 کو مسلم یونائیٹڈ فرنٹ کو انتخابات سے دور رکھنے کے لیے بھارتی فوج نے اشفاق مجید وانی اور سیکڑوں کارکنوں کو گرفتار کر لیا۔

بھارت کے اوچھے ہتھکنڈوں کے جواب میں اشفاق مجید وانی نے جموں وکشمیر لبریشن فرنٹ میں شمولیت اختیار کی اور تحریکِ آزادی کے سرگرم رکن بن گئے۔ اشفاق وانی کی 3سالہ جدوجہد نے وادی کشمیر میں تحریکِ آزادی کی نئی روح پھونک دی اور اشفاق وانی کی قیادت میں ہزاروں نوجوان بھارت کے غاصبانہ اقدام کے خلاف تحریکِ آزادیٔ کشمیر میں شامل ہوئے۔

بھارتی سرکاری ذرائع کے مطابق 10 ہزار سے زائد کشمیری نوجوان اشفاق مجید وانی سے متاثر ہو کر تحریک آزادی کشمیر میں شامل ہوئے، 30 مارچ 1990 کو 23 سال کی عمر میں بھارتی فوج کے ساتھ مقابلے کے دوران سری نگر کے علاقے حَوّل میں جامِ شہادت نوش کیا۔

اشفاق مجید وانی نے 1990 میں رمضان المبارک کے تیسرے روزے میں جامِ شہادت نوش کیا۔ اُن کی ڈائری کے مطابق ماہِ رمضان میں روزے کی حالت میں شہادت اُن کی دلی خواہش تھی، اشفاق مجید وانی کی شہادت پر وادی بھر میں پر تشدد ہنگامے پھوٹ پڑے تھے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔