کراچی:
پاکستان پیپلز پارٹی (پی پی پی) کی رکن سندھ اسمبلی روما مشتاق مٹو نے سندھ میں ضمنی بلدیاتی انتخابات میں کامیابی پر کہا ہے کہ عوام نے ایک بار پھر پی پی پی کی قیادت پر بھرپور اعتماد کا اظہار کیا ہے۔
پارلیمانی سیکریٹری برائے اقلیتی امور روما مشتاق مٹو نے اپنے بیان میں پاکستان پیپلز پارٹی کو بلدیاتی انتخابات میں تاریخی اور شان دار کامیابی پر دلی مبارک باد پیش کی ہے۔
انہوں نے کہا کہ یہ کامیابی اس بات کا واضح ثبوت ہے کہ عوام نے ایک بار پھر پیپلز پارٹی کی قیادت پر بھرپور اعتماد کا اظہار کیا ہے۔
ان کا کہنا تھا کہ سندھ کے عوام نے اپنی ووٹ کی طاقت سے یہ ثابت کر دیا ہے کہ وہ شہید ذوالفقار علی بھٹو اور شہید محترمہ بینظیر بھٹو کے مشن اور نظریے سے آج بھی جڑے ہوئے ہیں۔
روما مشتاق مٹو نے کہا کہ چیئرمین بلاول بھٹو زرداری کی پرعزم اور ولولہ انگیز قیادت میں عوامی خدمت، ترقی اور خوش حالی کا نیا دور شروع ہو چکا ہے۔
انہوں نے اس عزم کا اظہار کیا کہ نومنتخب نمائندے اپنی ذمہ داریوں کو عبادت سمجھ کر ادا کریں گے اور عوامی مسائل کے حل کو اپنی پہلی ترجیح بنائیں گے۔
ایم پی اے نے مزید کہا کہ حکومت سندھ عوامی مینڈیٹ کی پاسداری کرتے ہوئے ترقی اور فلاح و بہبود کے منصوبوں پر مزید تیزی کے ساتھ عمل کرے گی تاکہ عوام کے خوابوں کو تعبیر دی جا سکے اور ان کے اعتماد پر پورا اترا جا سکے۔
