کراچی میں فائرنگ سے ڈپٹی ڈائریکٹر لینڈ اور ڈائریکٹر این ایچ اے جاں بحق

تحقیقات کی جارہی ہے کہ آیا واقعہ ذاتی دشمنی کا نتیجہ ہے یا ٹارگٹ کلنگ کی کوئی واردات ہے، پولیس فوٹو: ایکسپریس نیوز

---

KARACHI: نیپا اردو سائنس کالج کے قریب نامعلوم افراد کی فائرنگ کے نتیجے میں ڈپٹی ڈائریکٹر لینڈ اورڈائریکٹر نیشنل ہائی وے اتھارٹی جاں بحق ہوگئے۔

ایکسپریس نیوز کے مطابق مسلح افراد نے گلشن اقبال ٹاؤن کے علاقے نیپا کے قریب سرکاری نمبر پلیٹ کی ڈبل کیبن گاڑی کو نشانہ بنایا جس کے نتیجے میں ڈپٹی ڈائریکٹر لینڈ طلعت یوسف اور ڈائریکٹر نیشنل ہائی وے اتھارٹی سہیل بھٹی جاں بحق ہوگئے، فائرنگ کے واقعے کے بعد پولیس اور رینجرز کی بھاری نفری نے جائے وقوعہ پر پہنچ کر علاقے کو گھیرے میں لے لیا جب کہ ریسکو ٹیموں نے لاشوں کو ضابطے کی کارروائی کے لئے جناح اسپتال منتقل کردیا۔

دوسری جانب ایس ایس پی ایسٹ کا کہنا تھا کہ 2 موٹر سائیکلوں پر سوار 4 ملزمان نے 9 ایم ایم پستول سے سرکاری گاڑی پر فائرنگ کی جس کے نتیجے میں اس میں سوار دونوں موقع پر ہی جاں بحق ہوگئے جب کہ پولیس کا کہنا ہے کہ واقعے کی تحقیقات کی جارہی ہے کہ آیا یہ ذاتی دشمنی کا نتیجہ ہے یا ٹارگٹ کلنگ کی کوئی واردات ہے۔