نیب نے چہرے نہیں کیس دیکھنے کی پالیسی شروع کر رکھی ہے چیئرمین نیب

بدعنوانی کو ہر قیمت پر ختم کرنے کے لیے نیب کی تشکیل نو کی گئی ہے، جسٹس (ر) جاوید اقبال کا بیان۔ فوٹو : فائل

---

قومی احتساب بیورو (نیب) کے چیئرمین جسٹس (ر) جاوید اقبال نے کہا ہے کہ نیب کی احتساب سب کیلیے کی پالیسی کی بدولت نیب نے چہرہ نہیں کیس کودیکھنے کی پالیسی اختیار کر رکھی ہے۔

نیب کی جانب سے جاری بیان کے مطابق انھوں نے کہاکہ قومی احتساب بیورونے بدعنوان عناصر، اشتہاری اور مفروروں کو پکڑنے اورآہنی ہاتھوں سے نمٹنے کا پختہ عزم کر رکھا ہے۔ چیئرمین نیب نے کہاکہ پوری قوم کی ملک سے بدعنوانی کے خاتمہ کیلیے نیب سے امیدیں وابستہ ہیں۔ نیب تمام اسٹیک ہولڈرز کے ساتھ مل کر قوم کی توقعات پر پورا اترے گا، انہوں نے کہا کہ قومی احتساب بیورو کی بلاامتیازکارروائیوں سے اس کی عزت اور وقار میں کئی گنا اضافہ ہوا ہے۔

چیئرمین نیب نے کہا کہ بدعنوانی کو ہر قیمت پر ختم کرنے کیلیے نیب کی تشکیل نو کی گئی، تمام ڈائریکٹر جنرلزکو ہدایت کی گئی ہے کہ وہ بدعنوان عناصر سے کوئی رعایت نہ برتیں اور انہیں قانون کے کٹہرے میں لائیں انہوںنے نیب کے تمام رینک کے افسران کوہدایت کی کہ سخت محنت، شفافیت اورمیرٹ کو یقینی بنائیں۔

جسٹس (ر) جاوید اقبال نے کہا کہ نیب کی انسداد بدعنوانی کی قومی حکمت عملی کا ٹرانسپرنسی انٹرنیشنل، پلڈاٹ اور عالمی اقتصادی فورم جیسے قومی اورعالمی اداروں نے اعتراف کیاجو کہ نیب کی کوششوں سے پاکستان کیلیے باعث فخر ہے انہوں نے کہاکہ نیب نے مقدمات کو تیزی سے نمٹانے کیلیے زیادہ سے زیادہ 10 ماہ کاعرصہ مقرر کیا ہے۔

چیئرمین نیب نے کہاکہ قانون پر عملدرآمد اور پراسیکیوشن کے معاملات پر روزانہ ہفتہ وار اور ماہانہ بنیادوں پر جائزہ لیا جا رہا ہے، انہوں نے کہا کہ نیب ملک بھرمیں سورج کی طرح چمک رہا ہے کیونکہ اس کی کارکردگی مجموعی شرح سزا 77 فیصد کے ساتھ ریکارڈ کامیابی ہے۔