کرینہ کپور کی فلم ’’گوری تیرے پیار میں‘‘ کل سینما گھروں کی زینت بنے گی

میری یہ فلم دلچسپ اور دیکھنے کے قابل ہے عمران خان نے بھی اپنی صلاحیتوں کا بھر پور اظہار کیا ہے، امید ہے گوری تیرے پیار میں لوگوں کو پسند آئے گی، کرینہ فوٹو: فائل

---

کرینہ کپور خان کی رومانوی فلم ''گوری تیرے پیار میں '' کل سینما گھروں کی زینت بنائی جائے گی ۔پونیت ملہوترا کی ہدایتکاری میں تیار ہونے والی فلم ''گوری تیرے پیار میں'' میں کرینہ کپور کے ساتھ عمران خان نے مرکزی کردار ادا کیا ہے۔

فلم ''گوری تیرے پیار میں'' ایک ایسی سماجی کارکن کی کہانی ہے جو اچانک شہر کی زندگی چھوڑ کر بھارتی گجرات کے ایک گاؤں کے باسیوں کی مدد کے لیے وہاں پہنچ جاتی ہے ۔ فلم میں کرینہ کپور نے دیاشرما نامی لڑکی کا کردار ادا کیا ہے۔ اس فلم میں کرینہ نے شوخ و چنچل حسینہ سے گاؤں کی سیدھی سادی مٹیاربن کر خوبصورت اداکاری کی ہے، جسے شائقین بیحد سراہیں گے۔ فلم میں اس کا دوست سری رام وکانت جس کا کردار عمران خان نے ادا کیا ہے اسے واپس لانے کے لیے گاؤں جا پہنچتا ہے جہاں اسے دلچسپ وعجیب صورتحال کا سامنا کرنا پڑتا ہے۔ فلم میں ''عاشقی ٹو'' سے شہرت پانے والی اداکارہ شردھا کپور بھی جلوہ گر ہورہی ہیں اور انھوں نے شیبو پاٹیل نامی لڑکی کا کردار ادا کیا ہے جو دیا شرما (کرینہ کپور) کی دوست ہے۔ ایشا گپتا کا ائٹم سانگ بھی فلم ''گوری تیرے پیار میں'' کا حصہ ہے جب کہ تامل اداکار نزہلگل روی بھی اس فلم کا حصہ ہیں۔

دھرما پروڈکشن کے بینرتلے بننے والی فلمساز کرن جوہر کی اس فلم کا میوزک ''آئی ہیٹ لو اسٹوری'' کے موسیقاروشال شرما نے تیار کیاہے۔ فلم میں پانچ گانے شامل کیے گئے ہیں جن میں سے ایک شادی کا گیت ہے جسے میکا سنگھ نے گایا ہے۔ کرینہ کپور خان کا کہنا ہے میری یہ فلم ''گوری تیرے پیار میں'' دلچسپ اور دیکھنے کے قابل ہے ۔ اس سے پہلے عمران خان کے ساتھ میری فلم ''ایک میں اور ایک تو'' اچھا تجربہ تھا مگر یہ اس سے بہت مختلف ہے اوریہ عوامی فلم ہے۔ اداکارہ کا کہنا تھا کہ میں نے اپنے کیریئر میں پہلی مرتبہ کسی گاؤں میں کام کے سلسلہ میں قیام کیا اوروہ لمحات مجھے ہمیشہ یاد رہیں گے جب میںنے گاؤں میں جاکر اس فلم میں شوٹنگ میں حصہ لیا اب میرے خیال میں ایسا ممکن نہیں ہے کہ میں ایس ہی کسی فلم میں دوبارہ کام کروں جس میں مجھے گاؤں جانا پڑے اور میں وہاں کی رہنے والی دکھائی دوںکرینہ کا عمران خان کی اداکاری کے متعلق کہنا تھا کہ اس نے فلم گوری تیرے پیار میں بہت اچھی پرفارمنس دکھائی اور بطور اداکار اس فلم میں اپنی بہترین صلاحیتوں کا اظہار کیاہے ۔



اس کی پرفارمنس ایک ہیرو کی طرح دکھتی ہے ۔ادھر روینہ ٹنڈن نے ٹویٹر پر اپنے ایک پیغام میں کہا ہے کہ عمران اور کرینہ کپور دونوں ایک ساتھ بہت اچھے لگتے ہیں میں ایک بار پھر انھیں فلم گوری تیرے پیار میں سینما اسکرین پر دیکھنے کا شدت سے انتظار کررہی ہوں۔واضح رہے کہ 21ستمبر 1980کو کپور خاندان کے اہم اداکار رندھیر کپور اور ببیتا کے گھر میں پیدا ہونے والی کرینہ جسے پیار سے بے بو بھی کہا جاتا ہے بھارت کے نامور فلمساز و اداکار راج کپور کی پوتی ہیں ،رشی کپور ان کے چچا ہیں۔ کرشمہ کپور ان کی بڑی بہن ہیں۔ کرینہ نے گریجوایشن کے بعد کامرس کے مضمون رکھ لیا اور دو سال پڑھنے کے بعد لاء کالج میں قانون کی تعلیم حاصل کرنے لگیں، اور ایک سال لاء پڑھنے کے بعد فیصلہ کیا کہ اسے اداکاری کرنا چاہیے جس کے بعد اس نے اندھیری ایکٹنگ انسٹی ٹیوٹ میں داخلہ لے کر اداکاری سیکھنا شروع کردی۔ واضح رہے کہ اداکارہ کی 2000 ء میں پہلی فلم '' رفیوجی'' ریلیز ہوئی جس میں انھوں نے اپنی بہترین پرفارمنس پر فلم فیئر ایوارڈ جیتا۔

2001 میں فلم ''مجھے کچھ کہنا ہے ''،''یادیں''، ''اجنبی ''، '' اشوکا ''، ''کبھی خوشی کبھی غم'' 2002 میں ''مجھ سے دوستی کروگی ''، ''جینا صرف میرے لیے '' 2003 میں فلم ''تلاش''،''میں پریم کی دیوانی ہوں ''، ''ایل اوسی کارگل'' 2004 میں ''چمیلی''، ''یوو''،''فدا''، ''اعتراض ''،''ہلچل'' 2005 میں فلم ''بے وفا''، ''کیونکہ''، ''دوستی'' جب کہ 2006 میں فلم ''36 چائنا ٹاؤن''،''چپکے چپکے''،''اومکارا'' اور فلم ''ڈان'' میں پرفارم کیا۔ 2007 کے دوران فلم''کیا لو اسٹوری ہے''،''جب وی میٹ''میں کام کیا، 2008 میں فلم ''ہلہ بول''، ''تلاش''،''روڈ سائیڈ رومیو''اور فلم ''گول مال ریٹرنز'' میں اداکاری کے جوہر دکھائے۔ 2009 میں فلم ''لک بائی چانس''، ''بلیو''، ''کمبخت عشق''اور فلم ''تھری ایڈیٹس'' میں فن کا جادو جگایا۔ 2010 میں فلم ''ملیں گے ملیں گے''،''وی آر فیملی '' اور ''گول مال تھری''میں صلاحیتوں کا اظہار کیا۔ 2011 میں فلم ''باڈی گارڈ''، ''را۔ ون'' میں عمدہ کام کرکے داد پائی، 2012 میں اداکارہ کرینہ کپور نے فلم ''اک میں اور اک تو''، ''راؤڈی راٹھور''، ''ہیروئن''، ''ایجنٹ ونود'' اور ''تلاش'' فلم میں جلوہ گرہوئیں۔اسی سال کرینہ کپور کی نئی فلم ''ستاگرہ'' بھی ریلیز ہوئی جس نے باکس آفس پر کئی ریکارڈ قائم کیے۔