پنجاب اسمبلی عمران خان کی امانت ہے جو انہیں واپس کردی پرویز الہٰی

عمران خان، پرویز الہی اور مونس الہی کی ملاقات کی تصویر (فوٹو : ویڈیو گریب)

---

وزیراعلیٰ پنجاب چوہدری اور (ق) لیگ کے رہنما پرویز الہی نے عمران خان سے ملاقات میں اسمبلی تحلیل کرنے کے فیصلے کی حمایت کا اعلان کردیا اور کہا ہے کہ پنجاب اسمبلی عمران خان کی امانت ہے اور یہ امانت انہیں واپس کر دی۔

ایکسپریس نیوز کے مطابق وزیراعلیٰ پنجاب چودھری پرویز الٰہی، سابق وفاقی وزیر مونس الٰہی اور ایم این اے حسین الٰہی زمان پارک پہنچے جہاں انہوں نے چیئرمین تحریک انصاف عمران خان سے ملاقات کی۔

عمران خان کے ہر فیصلے کا ساتھ دیں گے۔ پنجاب اسمبلی عمران خان کی امانت ہے اور یہ امانت انہیں واپس کر دی ہے۔ عمران خان نےمخالفین کی سیاست کو زیرو کر دیا ہے۔ افواہیں پھیلانے والے پہلے کی طرح اب بھی ناکام رہیں گے۔

— Ch Parvez Elahi (@ChParvezElahi) December 17, 2022

ملاقات میں وزیر اعلی خیبر پختونخوامحمود خان، شاہ محمود قریشی، اسد عمر، فواد چودھری، پرویز خٹک، شبلی فراز، علی امین گنڈاپور اور دیگر رہنما بھی موجود تھے۔

دونوں جماعتوں کے درمیان ملاقات میں اسمبلی کی تحلیل کے حوالے سے مشاورت ہوئی اور طے پایا کہ عمران خان پنجاب اور خیبرپختونخوا کے وزرائے اعلی کو ساتھ بٹھا کر اسمبلیاں تحلیل کرنے کے فیصلے کا اعلان کریں گے۔

یہ پڑھیں : ن لیگ نے وزیراعلی پنجاب کیخلاف تحریک عدم اعتماد پر عملدرآمد روک دیا

اس موقع پر چوہدری پرویز الہی نے کہا کہ عمران خان کے ہر فیصلے کا ساتھ دیں گے، پنجاب اسمبلی عمران خان کی امانت ہے اور یہ امانت انہیں واپس کر دی ہے۔

پرویز الٰہی نے مزید کہا کہ عمران خان نے مخالفین کی سیاست کو زیرو کر دیا، افواہیں پھیلانے والے پہلے کی طرح اب بھی ناکام رہیں گے۔ اسی طرح مونس الہی نے کہا کہ عمران خان کی آواز پر لبیک کہیں گے، ہمارا اتحاد پہلے سے زیادہ مضبوط ہے۔

آج زمان پارک میں پاکستان تحریک انصاف کے چیئرمین عمران خان سے ملاقات کی-ملاقات میں اسمبلی کی تحلیل کے حوالے سے مشاورت کی گئی- عمران خان پنجاب اور خیبرپختونخوا کے وزرائے اعلی کو ساتھ بٹھا کر فیصلے کا اعلان کریں گے- pic.twitter.com/hDB2i8JOUu

— Ch Parvez Elahi (@ChParvezElahi) December 17, 2022

دریں اثنا چئیرمین تحریک انصاف عمران خان 8 بجے پنجاب اور خیبر پختونخوا کے وزرائے اعلی کے ہمراہ اہم خطاب کریں گے، یہ خطاب لبرٹی چوک لاہور سمیت ملک بھر میں لائیو دکھایا جائے گا۔