پی سی بی نے سندھ پریمیئر لیگ کیلئے این او سی جاری کردیا
پاکستان کرکٹ بورڈ اس لیگ کی کامیابی کیلئے ہر ممکن کردار ادا کرے گا، ذکا اشرف
سندھ کے نوجوانوں کے لیے خوشخبری پی سی بی نے سندھ پریمیئر لیگ کیلئے این او سی جاری کردیا۔
سابق صوبائی وزیر ناصر حسین شاھ نے چیئرمین پی سی بی ذکا اشرف سے ملاقات کی جس کے بعد پی سی بی ہیڈ آفس میں کئی دنوں سے رکی ہوئی این او سی جاری کردی گئی۔
ملاقات میں صدر ایس پی ایل عارف ملک، پی سی بی کے ڈائرکٹر ڈومیسٹک ندیم خان اورپی سی بی کے دیگرعہدے داران بھی موجود تھے۔ چیئرمین پی سی بی ذکا اشرف کا کہنا تھا کہ پاکستان کرکٹ بورڈ اس لیگ کی کامیابی کے لئے ہر ممکن کردار ادا کرے گا۔
ناصر حسین شاھ نے کہا کہ لیگ کا انعقاد چیئر مین پی پی بلاول بھٹو زرداری کے وژن کے مطابق کیا جا رہا ہے، ایس پی ایل کا کامیاب انعقاد یقینی طور پر سندھ کی کھیلوں کی تاریخ میں ایک نئے باب کا اضافہ ہوگا۔
ناصر حسین شاھ کا کہنا تھا کہ اس لیگ کے ذریعے نا صرف کرکٹ ٹیلنٹ بلکہ سندھ کی ثقافت کو بھی نمایاں انداز سے اجاگر کیا جائے گا تاکہ نا صرف سندھ بلکہ پاکستان کی خوب صورتی اور کلچر دنیا کے سامنے پیش کیا جا سکے۔