متنازع میونسپل یوٹیلٹی چارجز وصول کرنیکی پھر کوشش شروع

قرارداد پر اپوزیشن کی جانب سے کونسل اجلاس میں ہنگامہ آرائی اور احتجاج کا امکان۔ فوٹو فائل

---

کراچی کے شہریوں سے ایک بار پھر متنازع میونسپل یوٹیلٹی چارجز وصول کرنے کیلیے کوشش شروع کردی گئی۔

میئر کراچی مرتضیٰ وہاب نے کراچی کے شہریوں سے ایک بار پھر متنازع میونسپل یوٹیلٹی چارجز وصول کرنے کیلیے کوشش شروع کردی، کے الیکٹرک کے ذریعے یوٹیلٹی چارجز وصول کرنے کیلیے سٹی کونسل سے قرارداد منظور کرانے کا فیصلہ کرلیا۔

بلدیہ عظمی کراچی کی کونسل کا اجلاس آج(جمعہ کو) صبح 11 بجے طلب کرلیا گیا ہے جس میں کراچی کے شہریوں سے میونسپل یوٹیلیٹی چارجز کے الیکٹرک کے ذریعے وصول کرنے کی قرارداد کو ایجنڈے میں شامل کیا گیا ہے جس کی منظوری کونسل کے اجلاس میں لی جائے گی، مذکورہ قرارداد پر اپوزیشن کی جانب سے کونسل اجلاس میں شدید ہنگامہ آرائی اور احتجاج کا امکان ہے۔

یہ بھی پڑھیں: سندھ ہائیکورٹ؛ بجلی بِلوں میں میونسپل چارجز کی وصولی کیخلاف حکم امتناع میں توسیع

دریں اثنا ایجنڈے میں کونسل کے لیڈر آف دی ہاؤس اور اپوزیشن لیڈر کے ایمپریسٹ اکاؤنٹ پچیس پچیس ہزار روپے مہینے میں چار مرتبہ وصول کرنے سمیت کونسل سیکریٹریٹ کو چالیس چالیس ہزار روپے ہرماہ تین مرتبہ دینے کی منظوری بھی ایجنڈے میں شامل کی گئی ہے۔

علاوہ ازیں ایجنڈے میں گلستان جوہر میں جوہر چورنگی سے حبیب یونیورسٹی کو جانیوالے انڈر پاس کو شہدافلسطین کے نام سے منسوب کرنے سمیت کونسل کمیٹیو ں اور ان کے اراکین کی تعداد کا تعین سمیت دیگر قراردادوں کو ایجنڈے میں شامل کیا گیا ہے۔