بھارت سے 1100 سکھ یاتری واہگہ کے راستے بذریعہ ٹرین پاکستان پہنچ گئے

سکھ یاتری اپنے روحانی پیشوا بابا گورونانک کے 546ویں یوم پیدائش کے موقع پر منعقدہ تقریبات میں شرکت کریں گے۔

ویب ڈیسک November 04, 2014

یاتریوں کی حفاظت اور نگرانی کے لئے رینجرز کے کمانڈوز تعینات کئے گئے جبکہ سکھ یاتری خصوصی ٹرین کے ذریعے ننکانہ صاحب جائیں گے. فوٹو؛فائل

سکھوں کے روحانی پیشوا گرونانک کا 546 واں یوم پیدائش منانے کے لئے بھارت سے 1100 سکھ یاتری واہگہ کے راستے بذریعہ ٹرین پاکستان پہنچ گئے۔

ایکسپریس نیوز کے مطابق سانحہ واہگہ بارڈر کے بعد ایک مرتبہ پھر زندگی پہلے کی طرح رواں دواں ہے جبکہ 1100 سکھ یاتری اپنے روحانی پیشوا بابا گرونانک کے 546ویں یوم پیدائش کے سلسلے میں منعقد کی جانے والی تقریبات میں شرکت کے لئے پاکستان پہنچ چکے ہیں۔ واہگہ پرمتروکہ وقف املاک بورڈ، سکھ گردوارہ پربندک کمیٹی فار پنجاب رینجرز کی طرف سے یاتریوں کا استقبال کیا گیا۔

سکھوں کی آمد کے موقع پر واہگہ ریلوے اسیشن پر خصوصی انتظامات کئے گئے تھے۔ یاتریوں کی حفاظت اور نگرانی کے لئے رینجرز کے کمانڈوز تعینات کئے گئے جبکہ سکھ یاتری خصوصی ٹرین کے ذریعے ننکانہ صاحب جائیں گے جہاں وہ گرونانک کی تقریبات میں شریک ہوں گے۔ سکھ یاتری 9 نومبر کو گردوارہ ڈیرہ صاحب لاہور پہنچیں گے اور 13 نومبر کو واپس بھارت روانہ ہوں گے۔ پاکستان کی طرف سے تین ہزار سکھ یاتریوں کو پاکستان آنے کی اجازت دی گئی لیکن بھارت نے صرف 2 ہزار یاتریوں کو پاکستان جانے کی اجازت دی ہے۔