ڈہرکی:
ڈہرکی کے علاقے سون میانی کے قریب مسافر بس سے اغوا کے واقعے کے بعد پولیس اور ڈاکوؤں کے درمیان شدید فائرنگ کا تبادلہ ہوا۔
پولیس کے مطابق بروقت کارروائی کے نتیجے میں اغوا کیے گئے 10 مسافروں کو بحفاظت بازیاب کرا لیا گیا ہے۔
ڈی ایس پی اوباڑو عبدالقادر سومرو کے مطابق مرید شاخ گڈو کشمور روڈ پر مسافر بس سے مجموعی طور پر 19 مسافروں کو اغوا کیا گیا تھا۔
ڈاکو مغوی مسافروں کو کچا کراچی کی جانب لے جانے کی کوشش کر رہے تھے، تاہم پولیس نے فوری تعاقب شروع کر دیا۔
واقعے کی سنگینی کے پیش نظر ڈی آئی جی سکھر، ایس ایس پی گھوٹکی، ایس ایس پی سکھر اور ایس ایس پی خیرپور بھی کچے کے بند پر پہنچ گئے، جہاں آپریشن کی نگرانی کی جا رہی ہے۔
پولیس کے مطابق ڈاکو براستہ بھونگ فرار ہوئے ہیں جبکہ ان کا تعاقب جاری ہے۔
پولیس حکام کا کہنا ہے کہ گھنے گنے کی فصل اور شدید دھند کے باعث آپریشن میں مشکلات کا سامنا ہے، تاہم علاقے کی ناکہ بندی کر دی گئی ہے۔
رینجرز کمانڈر بھی پولیس کے ہمراہ مشترکہ آپریشن میں شریک ہیں۔
واضح رہے کہ گزشتہ رات کوئٹہ جانے والی مسافر بس کو گڈو کشمور لنک روڈ ایم فائیو پر پر مسلح افراد نے مسافر کوچ پر اندھا دھند فائرنگ کی اور گاڑی رکنے کے بعد مسافروں کو تشدد کا نشانہ بنایا۔
بس رکنے کے بعد ڈاکو 25 مسافروں کو اغوا کر کے لے گئے جبکہ واقعے کے بعد پولیس اور رینجرز کی بھاری نفری جائے وقوعہ پر پہنچی اور ڈاکوؤں کا تعاقب جبکہ سرچ آپریشن بھی شروع کردیا۔
حکام کے مطابق باقی مغوی مسافروں کی بحفاظت بازیابی کے لیے کارروائی جاری ہے اور جلد مزید پیش رفت متوقع ہے۔
