یوٹیوبر عرفان جونیجو کا کشمیر کی صورتحال پر ویڈیو بنانے سے صاف انکار

 کراچی: مودی سرکار کی کشمیر میں جاری خونریزی کے خلاف آواز نہ اُٹھانے پر یوٹیوبرز پر خاصی تنقید دیکھنے میں آئی اس حوالے سے معروف یوٹیوبر عرفان جونیجو کا رد عمل سامنے آیا ہے جس میں انہوں نے کشمیر کی صورتحال پر ویڈیو بنانے سے صاف انکار کردیا ہے۔

عرفان جونیجو نے ایک ویڈیو جاری کی ہے جس میں کشمیر کے حوالے سے وی لاگ نہ بنانے پر تنقید کرنے والوں کو جواب دیتے ہوئے کہا کہ مجھے انسٹا گرام اور دیگر سوشل میڈیا اکاؤنٹ پر ان باکس آرہے تھے کہ کشمیر پر ویڈیو کیوں نہیں بنائی؟ آپ کی غیرت کم ہوگئی؟ کیا ویڈیو بنانے سے بھارتی فالوورز کم ہو جائیں گے؟ اور گالیاں بھی دی گئیں۔

عرفان جونیجو نے یہ بھی کہا کہ صارفین کی جانب سے کیے جانے والے میسجز میں مجھ سے درخواست نہیں کی گئی بلکہ وہ دھمکیاں ہیں، میں کشمیر پر ویڈیو نہیں بناؤنگا وہ اس لیے کہ میں پہلے بھی سیاسی اور مذہبی موضوع پر ویڈیو بنا کر غلطی کرچکا ہوں جس پر لوگوں کا ردعمل منفی تھا۔

You may cancel me if you want to but I will NOT make a video about whatever is happening in Kashmir. NOT because I support the oppressors or I am afraid of losing Indian followers but because I also didn't make a video when Quetta Hazaras were protesting with the dead bodies…

— Irfan Junejo (@irfanjunejo) August 17, 2019

عرفان نے ویڈیو نہ بنانے کی وجہ بتاتے ہوئے کہا کہ کوئٹہ میں ہزارہ برادری اپنے پیاروں کی لاشیں رکھ کر احتجاج کر رہی تھی، میں نے اس پر بھی ویڈیو نہیں بنائی، اہل تشیع لاپتا افراد کا خاندان مظاہرہ کر رہا تھا میں نے ان کی بھی ویڈیو نہیں بنائی، میرے پاس سب بہترین موقع تھا جب بھارتی فضائیہ کے پائلٹ ابھی نندن کو پکڑا تھا، اس سے میں بہت پیسہ کما سکتا تھا لیکن میں نے اس پر بھی ویڈیو نہیں بنائی۔

یوٹیوبر نے یہ بھی کہا کہ میں یہ نہیں کہہ رہا کہ جو بھی کشمیر میں معصوم کشمیریوں کے ساتھ ہو رہا ہے وہ معمولی بات ہے، مجھے اندازہ ہے وہاں کیا ہو رہا ہے، مجھے اس بات کا دکھ بھی ہے کیوں کہ یہ بہت ہی حساس معاملہ ہے اور کشمیر میں ہونے والی بربریت کی مذمت بھی کرتا ہوں۔

واضح رہے کہ مودی سرکار کی جانب سے کشمیریوں پر جاری ظلم و جبر کے خلاف خاموشی اختیار کیے جانے پر تنقید کی جارہی تھی یہاں تک کہ گزشتہ روز عرفان جونیجو ٹویٹر پر ٹاپ ٹرینڈ بھی بنے ہوئے تھے۔