تقریباً 150 گھونگھوں کو پالنے والی خاتون

ویب ڈیسک  منگل 31 مارچ 2020
برطانیہ کی خاتون نے اپنے گھر میں مختلف اقسام کے 150 گھونگھے پال رکھے ہیں۔ فوٹو: دی کریزی اسنیل لیڈی فیس بک پیج

برطانیہ کی خاتون نے اپنے گھر میں مختلف اقسام کے 150 گھونگھے پال رکھے ہیں۔ فوٹو: دی کریزی اسنیل لیڈی فیس بک پیج

 لندن: اگرچہ دنیا میں عجیب و غریب پالتو جانوروں کو پالنے کا رحجان بھی موجود ہے لیکن ایک خاتون نے گھونگھوں کو گود لینے کا فیصلہ کیا ہے اور اب تک 150 پالتو گھونگھے جمع کرکے ’ گھونگھا خاتون‘ کا اعزاز حاصل کرچکی ہیں۔

40 سالہ پیپر اپالو برطانیہ سے تعلق رکھتی ہیں اور اپنے لیے ’کریزی اسنیل لیڈی‘ کا نام استعمال کرتی ہیں۔ ایک ڈاکیومینٹری میں وہ کہتی ہیں کہ دس سال قبل انہیں گھونگھوں سے محبت ہوگئی اور اب فیس بک ہو یا انسٹاگرام ان کی پوسٹس میں جگہ جگہ گھونگھے نظر آئیں گے۔ تاہم ان کے پاس خول والے گھونگھوں کی تعداد بہت زیادہ ہے۔

وہ کہتی ہیں کہ لوگوں کی اکثریت گھونگھوں کو سست، بے کار اور دماغ سے عاری کیڑے قرار دیتے ہیں، لیکن وہ پیچیدہ احساسات رکھتے ہیں اور فیصلہ کرنے کے علاوہ ان کی یادداشت بھی ہوتی ہے خواہ یہ بات سائنس سے ثابت ہوچکی ہے یا نہیں لیکن ان کے مطابق گھونگھوں کو ان سے بہتر کوئی اور نہیں جانتا۔

کئی اقسام کے گھونگھے ان کے گھروں میں موجود ہیں اور وہ دن میں کئی مرتبہ ان کے لیے مزیدار کھانے تیار کرتی ہیں۔ انہوں نے اپنے سوشل میڈیا اکاؤنٹ پر گھونگھے پالنے، ان کی نسل خیزی اور دیگر ہدایات پر مبنی دستاویز بھی رکھی ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔